عرس الياس وفولمين بعيني
ـ1ـ
أَهْلا وْسَهلا بِالْجِيرانْ
يا وَرْد وْفُلّ وْياسْمِينْ
الْقَمَرْ، بِالْعالِي، سهْرانْ
وْإِنْتُو بْقَلْبِي سهْرانِينْ
وْهَـ السَّهْرَه مُشْ كِيفْ ما كانْ
في إِلْها مْعاني حِلْوِينْ
شَعِّتْ كِرْمال الْعِرْسانْ
الْـ حَبُّوا بَعْضُنْ مِنْ دُونْ غِش:
الْيَاس بْعَيْنِي وْفُولَمِينْ
ـ2ـ
يَا هْدِيِّةْ أَغْلَى مْحِبِّينْ
مشْتاقَه لأَهْلِكْ؟.. قُولِي
نِحْنا أَهْلِكْ.. نِحْنا مِينْ؟
أُوعَا تْكُونِي مَخْجُولِه
زَوْجِكْ هَـ الشَّبّ الرَّزِينْ
بْقَلْبُو إِنْتِي مَحْمُولِه
وْيِرْحَم تْرابُو سَاسِينْ
بَيِّكْ.. شَيْخ الرُّجُولِه
رْبِحْناكِي.. شُو مَبْسُوطينْ
ذِكَّرْتِينا بِالضَّيْعَه
وِبْأَيَّام الطُّفُولِه
ـ3ـ
بْضَيْعِتْنا زْرَعْنا مْحَبِّه
كِبْرِت الِمْحَبِّه يا ناسْ
حْمِلْناها.. مْحِينا الْغُرْبِه
وِالْغُرْبِه أَكْبَرْ وِسْواسْ
هَنِّي الْعِرْسانْ يا رَبِّي
تا فِيهُنْ يِتْعَلَّى الرَّاسْ
يْعِيشُوا بَرَّات الْكِذْبِه
وْما بْعِمْرُو يِتْمَرْمَرْ كاسْ
**